遊「幸福車站」 甜蜜滿分 錄音照片巨型投射紀錄戀愛宣言

話咁快，又到一年一度、充滿粉紅閃光彈嘅情人節，戀人們準備好節目未呢？聽公關姊妹講，今年唔少商場繼續有好多打卡好去處，由日本車站、心形裝置等樣樣都有，連黛安都睇到心心眼！

好似沙田新城市廣場咁，即日起至24日商場將會化身日本北海道嘅「幸福車站」（圖1），包括喺櫻花樹下融入列車、鳥居同吊鐘等5大日系幸福裝飾，打卡點滿滿，影完相仲可以將對情人嘅綿綿情話寫上祝願木牌，掛喺甜言蜜語祝願牆上，真係啱晒情侶嚟打卡放閃！

港島區商場亦有好推介，即日起至3月14日，赤柱廣場將推出「Sweet Valentine's」推廣活動，廣場同美利樓唔同角落合共有5大打卡位，好似粉紅發光鞦韆架（圖2）、心形立體相框等，利用唔同層次嘅粉紅色，正好帶出邂逅、曖昧、相愛、熱戀至訂婚等各種戀愛階段，配合埋無敵海景，簡直唔可以錯過！

黛安仲知道，廣場更首次聯乘YumMePrint，為戀人們即場免費打印錄音照片，有靚相睇之餘，之後仲有得聽番對方嘅甜蜜留言，好浪漫啊！

講完咁多打卡點，不妨再為摯愛製造一啲更有特色嘅驚喜！公關姊妹分享，今年天際100觀景台特別於情人節首次推出「愛在天際幸福宣言」預訂服務，畀你可以喺393米高空「愛在天際」光影滙演播放之際投射出愛的宣言，想像下喺觀景台長達9米嘅巨型玻璃屏幕上，投射出有兩人名字嘅動畫留言，無論表白定求婚都一流！大家記住把握機會，為另一半炮製情人節驚喜喇！