又出醜？4港男遊日入咖啡店 斟水齋坐惹爭議

日本人注重禮儀向來是人所共知，而遊客亦好應遵守當地規則及尊重當地文化。有網民昨日在網上討論區發貼，指在日本北海道札幌新千歲機場的Hello Kitty咖啡店食午餐時，有4名港男衝入來斟水，齋坐玩手機大半小時，怒斥此舉十分「丟架」，是「影衰香港人」。

樓主以「窮就唔好學人去旅行，去旅行，就唔好影衰香港人！」為題發貼，指他和友人在咖啡店內準備開餐之際，看到有4名男子經過門口，「我聽到一個操流利香港話嘅人，佢話：『喂，呢度有水斟喎，唔洗錢㗎，入去囉～』」

其後，樓主只見4名男子「浩浩蕩蕩」地進入咖啡店，「佢地霸左一排位坐，然後個個都去自助飲水機攞杯裝水，裝完水飲就拎手機出嚟玩，仲要聲大大喺度高談闊論，我見啲職員眼望望無出聲，過咗大約大半個鐘，佢地飲夠玩夠之後，就施施然咁走人，乜都無幫襯，只有攪攪陣。」

最後，樓主表示：「我嘅意見係：窮唔係罪，但係唔好咁cheap，做埋咁多影衰香港人嘅事。出外旅遊，你就係代表左香港人，你嘅行為，唔係只代表你，亦都影響埋我地。」

此事引來網民熱議，不少人留言表示：「與貧富無關，人格問題...」、「真係好丟架，我作為香港人，都覺得俾佢地影衰晒！」、「太羞啦！攞人著數重要大大聲！」、「不論咩人都好，阻住人哋做生意始終都唔係咁好。」不過，亦有網民認為樓主多事、八卦，「人地日本人都無出聲，關你X事咩？」、「日本人已經見慣不怪，樓主唔使驚訝。」大家又點睇呢？