Scrabble奧數比賽連奪多獎 香港學生揚威海外

香港學生幾時都咁有才華，黛安近日又收到幾個喜訊！其中香港Scrabble代表隊上星期遠赴杜拜參加世界青年Scrabble大賽（WESPA Youth Cup），2位循道中學同學羅朗然同布震和，喺14個國家嘅116位選手中脫穎而出，躋身全球頭10名。另外，香港數學奧林匹克學校今年派出嘅4支代表隊，亦分別喺保加利亞、新加坡及馬來西亞等地贏得唔少國際獎項，真正揚威海外呀！

黛安身邊唔少姊妹都好鍾意玩Scrabble，考下自己嘅英文詞彙同應對能力，每年世青賽都吸引全球18歲以下玩家參與，今年香港Scrabble總會就派出11位本地中學生參加今個月13至15日舉行嘅賽事，最終羅朗然同布震和齊齊喺24回合嘅賽事中，拎到16場勝仗，分別排行第6同第9名！而年僅13歲、就讀中華基督教會蒙民偉書院嘅蕭鎮劻同學，就勇奪「最佳進步獎」。

除咗英文叻，香港學生數學水平都好高，香港數學奧林匹克學校今年派出4支年齡介乎8至15歲嘅代表隊，分別遠赴保加利亞、新加坡、馬來西亞等地參加比賽，結果順利囊括多個個人同團體獎項。好似今年7月喺新加坡舉行嘅「第十四屆IMC國際數學競賽」，香港代表隊就足足拎走咗8金、9銀及6銅嘅佳績，金獎得主更包括小一嘅方智彥、小二嘅曾曉洋、小三嘅殷皓陽、陳博瀚等人，其中陳博瀚同學更力壓同場選手，勇奪小三級全場總冠軍，之後又再喺上個月搞嘅「第五屆馬來西亞國際數學奧林匹克競賽」中，同另2名代表郝智榮同王奕諾，齊齊揮低多個參賽者，勇奪金獎，認真犀利！