學釀啤酒做瑜伽 欣賞本地樂隊 24小時玩轉灣仔

黛安平時最鍾意「捐窿捐罅」，搵好食、好玩嘅節目，最近旅遊事務署、同香港設計中心、香港動漫畫聯會一齊合作喺灣仔策動連續24小時創意活動，叫「#dd創玩24」，由今日下午6點起，24小時無間斷有創玩活動。

10大創意創玩體驗涵蓋空間設計、美食、藝術、舞蹈、運動同親子教育等，包括由石水渠啤釀酒師傅講解釀製啤酒技巧，瑜伽導師帶領做放鬆運動，仲有本地樂隊及歌手以最地道嘅音樂、最具港味聲音，展示本地音樂人對創作嘅熱情；亦有80後年輕設計師以反光物料發揮創意，探索時裝、人、動態及光綫嘅關係。公關姊妹話，希望透過活動畀本地創意團體發揮所長，展示社區創意多面性，喺同一個空間，感受不同體驗。

「#dd創玩24」另一個創意焦點項目就係「#dd創意·營造社區」，即喺同一時空作創意聯乘。一口設計工作室（One Bite）集合一眾創意單位，活化灣仔茂蘿街7號地下公眾休憩空間。早前工作室與香港知專設計學院共同以漢字嘅基本筆畫（點、撇、捺、折、弩）化作大型公共傢俱，加上巨型「#」裝置，令公共空間變得有趣又實用。