周柏豪一向比人討論得最多嘅唔係演技或者唱功,而係鼻窿,因為有網民發現佢個鼻窿隨住年齡嘅增長愈來愈大,無時無刻都搶咗佢鏡,有啲人甚至笑言:「想唱歌吸多幾啖氣先整大佢?」、「抖氣太用力喇。」、「連鼻哥窿都有戲!」甚至有網民瘋狂改圖,整左個MV特登focus喺佢個鼻窿度。可能比人講得太多個鼻,周柏豪決定要整大另一樣嘢,就係肌肉呀,搞到一直被人話似寵物小精靈比比鳥嘅佢,終於憑肌肉進化做大比鳥,唔知呢啲算唔算係視線轉移法呢?
周柏豪自從轉投TVB後,近年一直將重心放在電視劇上,拍攝了《使徒行者2》、《再創世紀》等等,令不少樂迷都擔心他會否放棄唱歌,但其實佢仍然好著重自己嘅音樂事業,一直為咗《One Step Closer Pakho Live 巡迴演唱會》努力。啱啱完咗珠海站,又要為嚟緊十二月嘅江門站做準備,呢段時間柏豪仲去健身室不斷操肌keep fit,加上配合均衡飲食,成功變咗做筋肉人,嚇窒唔少樂迷同網民,係咁留言問佢究竟點操到咁樣,連操開肌嘅Kenny關智斌、方力申都讚佢好有毅力。又係嘅,以前初出道嘅周柏豪真係好青澀,白白淨淨,身形瘦削,算得上係小鮮肉類型,如今變成筋肉人又的確係幾大驚喜嘅!
▼佢自己都post左初出道個樣做比較
見到大家總算著眼喺自己既肌肉上面,周柏豪今次飲得杯落喇,但佢唔會輕易鬆懈,揚言要將最強嘅意志力帶到舞台上:「這一年工作佔據了我所有的時間,但我相信現在這階段是十分重要,也是真真正正的開始,繼續堅持、繼續沉靜、繼續努力。」最後佢勉勵各位:「如果你覺得現在走的辛苦,那就證明你在走上坡路,你正前往定下在高處的目標,加油」
距離成個巡迴演唱會正式完結仲有大約三、四個月,周柏豪要繼續努力啊!