千呼萬喚，周星馳終於再執導演筒，不過並非拍傳聞中的《喜劇之王2》，新戲戲名叫《D計劃》至真，而男主角同樣是王寶強，女主角則有指是星女郎林允，今次是兩大喜劇巨匠首度交手，一舉一動都備受各界關注。而《D計劃》亦已秘密於內地開機，王寶強一埋位就大玩反串扮女人，變身驚嚇版白雪公主，睇嚟李健仁的「如花」終於有繼承人，難怪有關相片流出後，即時成為網上熱話，更有網民笑言：「王寶強呢個look真係唔好畀小朋友睇，唔係乜嘢童真都無晒，小心畀迪士尼告呀！」
雖然王寶強呢身造型已經夠晒噱頭，不過出名要求高的星爺似乎仲未滿意，事關有片場人員透露，星爺同王寶強曾因為演繹方式於片場發生爭執，有指當時王寶強拒絕聽從星爺安排，堅持以自己方式演繹角色，有耍大牌之嫌，其後雙方一度各持己見，不過最終星爺選擇讓步，在王寶強多番解釋下，答應對方以自己方式演戲，風波暫時算告一段落。
星爺出名惹火
其實星爺的才華絕對無庸置疑，不過講到人際關係就認真麻麻，同曾經合作無間的吳孟達、李力持與黃百鳴等都曾傳出不和，更被指一度與星女郎黃聖依、張雨綺反目成仇，不過最轟動的風波定非拍《功夫》時與洪金寶反面莫屬，有指星爺本身很欣賞洪金寶，故邀請他擔任動作導演，誰知其後雙方發生嚴重分歧，結果不少動作場面要不斷重拍再重拍，令洪金寶極度不滿，有傳佢最終頂星爺唔順自己走人，結果動作導演改由袁和平頂上。