曾幾何時，周星馳三個字堪稱金漆招牌，人人爭住拍星爺嘅戲，但隨住星爺退居幕後，加上已經好耐無新作面世，似乎令星爺光環有所褪色。事緣近日有報道指星爺有意開拍經典作《喜劇之王２》，搶攻明年賀歲檔，星爺自己做監製，並請來邱禮濤執導，男、女主角由王寶強與姚晨擔任，星爺近年愛將林允亦有份演出，雖知道當年《喜劇之王》成功令張栢芝一炮而紅，呢位「星女郎」理應是搶手貨，但有內地傳媒向姚晨求證，對方一口否認演出《喜劇之王２》，據知，劇組方面的確曾接觸姚晨，但因劇本與時間問題無緣合作。
雖然姚晨呢個名對大部份港人嚟講可能比較陌生，亦有人會覺得佢點解放棄同星爺合作嘅黃金機會，但實情姚晨本身是內地一線紅星，今年39歲的她演技早獲外界肯定，曾憑《潛伏》贏得華鼎獎最佳電視劇女主角，加上其形象正氣，於2013年獲任命為聯合國難民署中國區親善大使，翌年更獲美國《時代》雜誌選為「百大最有影響力人物」，難怪佢可以請星爺食檸檬啦！
網民支持栢芝參演
而有關消息一出，不少網民都為星爺提出後備方案，有人認為《喜劇之王》乃港產片經典，男女主角應該起碼有一位港星，否則隨時變得不倫不類，更有人希望星爺大發慈悲：「栢芝依家搞成咁，如果星爺畀機會佢再做柳飄飄，一嚟幫到栢芝，二嚟我哋都可以搵返初戀」、「《喜劇之王》又無星爺、又無栢芝仲點算喜劇呀？就算栢芝唔做主角，都可以做配角吖。」