美心Martin請韓國朋友 嘗中菜 品美酒

黛安上星期應美心中菜及m.a.x. concepts COO李文賢（Martin）邀請，再喺剛完成大裝修嘅尖沙咀星光行翠園旗艦店一嘗精緻中菜美食；而Martin今次就宴請咗包括香港韓國貿易館館長Dr. Chulho PARK、三星資產運用（香港）有限公司投資總監兼高級董事總經理李炳建（David）、獲米芝蓮推介嘅韓式小食店Kelly's Cape Bop老闆娘Una等去翠園食晚飯，同大家邊傾偈邊，享受美酒佳餚。

當晚菜式非常豐富，其中「堂弄火焰醉翁蝦」、「黃金脆皮糯米豬」、「生菜包乳鴿崧」等多款特色菜，都令韓國客人大讚，幾款菜式不但賣相精緻，而且味道一流。

喺翠園晚宴，當然不得不提佢地嘅一大特色，就係喺用餐大堂嘅櫥窗，放咗兩部透明玻璃燒烤爐，佢哋翠園嘅招牌菜翠園燒鵝皇就係喺呢個燒烤爐烤製。客人可邊享受餐桌上嘅美食，邊欣賞燒味烤製嘅過程，當晚幾位韓國女士都對呢個新穎設計讚譽有加，認為創意非凡。

美食當前，當然唔少得美酒，大家當晚就品嘗了山西汾酒，呢款係由高粱製成嘅美酒入口清香，回味無窮。黛安當晚見到好友Una，提起佢嘅小食店Kelly's Cape Bop嘅美食，實在令人回味，當中最出名就係正宗又無味精嘅自家製韓式紫菜飯卷，同埋煎蔬菜蛋卷，多款食物都有高纖蔬菜，好味得嚟又健康。