大閘蟹要趁後生食

「越浦黃柑嫩，吳溪紫蟹肥」，唐朝詩人杜牧食蟹食到要用詩來抒發那無窮的韻味，可想而知大閘蟹的魅力有多大！

「有酒有蟹，夫復何求？」我完全能代入詩人的境界！但遇着大閘蟹被檢驗出有害物質二噁英超標，江蘇兩個養殖場的大閘蟹之前禁止入口香港，令我這蟹癡大失所望。但蟹癮實在難捱，無陽澄湖大閘蟹，乜蟹都頂住先啦……但始終陽澄湖大閘蟹才是我的favourite。

皇天不負食蟹人，有朋友去陽澄湖並帶蟹回來香港！我又怎能放過佢？一於要同蟹「邂逅」，約咗去佢屋企食蟹。為今次的大閘蟹宴興奮的又豈只得我一人？比我更期待這「蟹逅」的還有梁思浩。

他已八年沒有食蟹了，原因是八年前肥姐入院垂危，志偉他們戒食至愛食物為肥姐祈福，思浩便戒了他至愛的蟹整整八年。所以，今次對大閘蟹宴的期待，我和他相比，簡直是小巫見大巫。

大閘蟹豐腴肥美，滋味鮮極，實在妙極！耀眼濃郁的蟹黃蘸鎮江黑醋，含在我嘴內之時，那份滿足的興奮直達大腦，實在令我太幸福了！之不過人到中年，邁向老年的我，這幸福感覺已不能像年輕時那麼澎湃了。因為當你正放任地享受，在欲仙欲死的「擦」蟹境界中，你身邊的人會不停提你食太多大閘蟹有幾危險，令我再也不能像後生時那樣吃13隻蟹了。不過，話說回來，現在拆蟹腳拆到第四隻，我的膊頭已開始痠痛。

原來仔要趁嫩生，蟹都要趁年輕力壯食！我現在更珍惜和大閘蟹的「相遇」。

（本欄逢周四刊登）