樂富「潛航凶間」 化身搜索員入鬼船

萬聖節就快到，黛安一向好鍾意刺激，當然周圍打聽下邊度有好玩嘅鬼屋喇！噚日畀黛安搵到好推介，就係領展樂富廣場嘅「潛航凶間」，今年活動以環保做主題，遊人可以化身成為搜索隊員，潛入海底非法捕魚嘅廢棄船。

鐳射槍擊 老少咸宜

黛安都率先試玩過，搜索之旅由船艙開始，周圍陷阱處處，血腥屠房仲吊滿一條條若隱若現嘅屍體！遊人仲要踏上殘破嘅木吊橋，好似隨時會斷裂咁，橋下亡魂當然有殺錯無放過。就算僥倖過關，跟住仲要走入勾滿屍體、發出惡臭嘅魚網，鬼魂隨時現身奪命！搜索員需要小心前行，一邊逃離廢棄船，一邊尋找到拯救人類嘅珍貴資源，聽落已經覺得夠晒驚嚇。

領展嘅萬聖節活動一向都注重老少咸宜，所以今次就新增中午親子時段，逢星期六、日同公眾假期下午1至4點，參加者可以利用鐳射槍擊退各樣破壞環境嘅「元兇」，適合一家大小一同探險！成功逃出廢棄船嘅參加者仲可以到毗鄰嘅嘉年華繼續挑戰。

領展PR姊妹仲話，今次活動破天荒同「大自然保護協會」合作，成個玩樂體驗中會增添有關環境、生態及環保等各方面嘅保育資訊及遊戲，鼓勵市民教育下一代愛惜環境嘅重要𠻹！