荔枝角明年開首間戲院 設500座位 播非主流電影

住喺荔枝角嘅朋友留意，嚟緊又多一個假日好去處！呢幾日接獲公關姊妹告知，由工貿商廈改建成嘅活化商場D2 Place，宣布引入韓國大型連鎖電影院品牌「CGV」，打造荔枝角區首間戲院，預計明年第一季開業。以後去睇戲又多個選擇啦！

共4個播影廳

據黛安所知，CGV目前係全球第5大國際連鎖影院品牌，喺全球7個國家擁有及經營超過370間高端影院咁多！近年仲積極發展嶄新嘅綜合影院模式，糅合電影、特色餐飲、社交及娛樂等元素，創造一個多元嘅文化空間。

即將落戶D2 Place嘅戲院，設計上會走美式復古風格，屆時入面會有4個播影廳及500個座位，並會引入韓國最新自家研發嘅「3S」影院系統。

所謂「3S」，即係代表Screen（屏幕）、Sound（音響）及Seat（座椅），戲院入面除咗會設置超高清放映設備、環迴立體音響，仲會提供人體工學梳化椅，希望將最優質嘅睇戲享受帶來香港。至於節目播放方面，聽講主打放映「非大路」嘅電影，目標係吸引年輕一族捧場。

目前D2 Place每逢周末都會舉辦唔同主題嘅創意市集，亦都積極舉辦一啲電影活動，好似最近就趁「法國五月」，喺天台搞電影放映會，嚟緊仲開埋戲院𠻹，難怪D2 Place所屬嘅羅氏集團CEO羅正杰話，相信新嘅發展會為社區及香港電影藝術發展帶來新衝擊啦！