新城市廣場恐龍公園 26米擬真恐龍骨架霸氣現身 下季落成

沙田新城市廣場嘅全方位空間活化計劃持續進行中，廣場5樓逾3.5萬呎嘅戶外空中花園，將變身成恐龍公園Dino Park，設有長26米、高7米，集繩網、攀爬、滑梯和鞦韆等於一身嘅擬真恐龍骨架組合式遊樂設施，重現昔日陸地霸主嘅氣勢，畀「小恐龍迷」喺彩色恐龍陪伴下大玩特玩；Dino Park預計今年第三季正式登場。

黛安聽公關姊妹講，Dino Park參考咗美國兒科醫學會發現小孩喜愛恐龍嘅原因而設計，園區除咗色彩繽紛外，更設有17項形態多元嘅玩樂設施，有助兒童喺玩樂中認識自己，發掘自我潛能，以及鍛練對外界觸感嘅靈敏度、四肢協調同平衡，啱晒喜歡周圍走嘅小朋友；公園勢將成為沙田區首個主打「全年齡」嘅休憩康體項目。

黛安知道，廣場仲為咗進一步鞏固作為新界東提供娛樂零售體驗商場嘅龍頭地位，未來將繼續擴大室內外嘅活化版圖，打造一個適合全家出行、集休閒、娛樂、運動、購物於一身嘅一站式生活圈，真係好期待呀！