香港仔漁民文化博物館 記載漁港變遷 玩味又懷舊

全港首間以漁民為主題嘅「香港仔漁民文化博物館」早前開幕，為配合博物館嘅試運，館方推出咗連串玩味活動，包括免費借出漁家帽畀公眾去海濱留影，大家亦可參加漁港城市文化導賞遊，點對點由香港仔出發，乘坐街渡到鴨脷洲探索漁民大龍出沒之處，喺充滿大型壁畫嘅龍竇盡情扮嘢打卡，遊覽完更可將懷舊明信片小禮物帶回家。

黛安知道，呢個博物館係《漁港濃情．香港仔》社區項目其中一環，內容以多角度記載漁港變遷，將逐漸消失嘅社區回憶重新結合起來，可謂資訊及趣味並重。博物館嘅展品會以視頻或相片呈現，可見到4款漁船，包括雙拖船、收魚船、曬家船、罟仔船，更有地區人士口述歷史訪問，及避風塘嘅重新佈局介紹等。

另外，2月至7月期間，佢哋會舉辦30次導賞遊，帶大家認識漁港城市設定嘅空間，增加大眾對香港仔嘅認識，活動可免費參加，現正接受2月至4月中嘅導賞遊報名，報名詳情可【按此】瀏覽。