商界環保協會大樓獲綠建鉑金級認證 歡迎預約參觀

位於九龍塘商界環保協會大樓（正名為「賽馬會環保樓」），最近攞咗「綠建環評既有建築」（2.0版）「綜合評估計劃」最高評級鉑金級認證，係繼2017年後再次成功取得呢個認證。黛安聽聞，原來呢座大樓當年攞綠建環評既有建築類別（1.2版）暫定鉑金級評級時，係香港首座商業建築物獲得呢個最高等級認證。

商界環保協會營運總監梁志峰工程師日前帶傳媒參觀大樓，介紹當中嘅綠色建築元素，包括物料選材、廢物管理設施及節能設備等，同埋天台太陽能光伏板系統等，佢仲話協會將大樓定位為「環保實驗室」，彰顯綠色建築理念，推動並弘揚環境卓越。

公關姊妹話，協會好歡迎相關團體參觀大樓，只要喺網上預約導賞活動（https://bec.org.hk/tc/building-tour），就可以喺專業人士帶領下參觀「環保實驗室」喇。