新港城中心化身雨林 展珍貴動物標本

黛安啱啱收到消息，馬鞍山MOSTown新港城中心由8月6日至10月4日，將化身熱帶雨林探索大本營，召集一眾冒險家參與「盛夏雨林探索站@MOSTown」主題活動，齊齊學習生物多樣性及保育知識。場內除有全方位電子「晝夜雨林體驗館」，更設置1.8米高、世界上體型最大嘅水獺「巨獺」雕塑，大家走進「雨林動物保育基地」更可訪尋多種瀕臨絕種嘅珍稀動物，了解其獨特生態。

另外，由港大生物科學學院專家團隊管理嘅香港生物多樣性博物館，亦會喺場內舉行「博遊生物@MOSTown」標本展，展出包括瀕危動物黃喉擬水龜等8種熱帶及亞熱帶雨林嘅珍貴動物標本，必定令你大開眼界！