白爛貓虎年造型現身東薈城 東港城搭建樂高^®雲霄虎城

為咗同大家迎接虎年，黛安知道，唔少商場正籌備賀年裝置同活動，例如東薈城名店倉本月15日至下月8日，會邀請亞洲人氣角色「白爛貓」同佢嘅朋友，打扮成虎年喜慶造型嚟香港團拜！商場二樓中庭將設6個主題打卡場景，如《橫財就手》貓抓板、《步步高陞》貓爬架等。場內仲為粉絲準備咗「爛爛抱喜」新春AR濾鏡體驗，只要喺指定嘅位置掃描二維碼，再啟動ig或fb嘅AR濾鏡，3D白爛貓就會出現同大家互動；喺ig或fb分享合照，再即場登記做CLUB CG準會員或出示電子會員卡，可換新春主題貼紙㗎。另外，會員喺本月17日至下月6日用電子貨幣買夠指定金額，更可換限定禮品同現金券㖭。

另外，將軍澳東港城本月13日至下月28日會同樂高^®合作，喺商場搭建「樂高^®雲霄虎城」新年裝置，其中一個焦點係由大中華區首位樂高^®專業認證大師洪子健主理嘅巨型老虎「福虎靈動賀新禧」，福虎嘅姿態栩栩如生。場內更特設3大互動遊戲，The Point by SHKP會員只需憑1,000積分就可參加每周嘅挑戰，最高分嘅玩家可獲50,000積分同LEGO^®套裝㗎。