時代廣場手鞠球利市封 寓意富貴團圓

想開年圓滿大吉，當然唔少得寓意祝福嘅利市封啦。黛安每年都幫媽咪物色城中最特別、精緻嘅利市封，今年時代廣場推出嘅限定手鞠球「富貴團圓」利市封，同「好事成雙」利市袋，真係靚到令黛安即時心心眼。公關姊妹話，用來做主題嘅手鞠球，源至唐代嘅蹴鞠，古時已經係為人帶來祝福嘅幸運球，如今用來送畀摯愛，夠晒喜氣洋洋。

一套8個嘅利市封，除咗有特別嘅圓形設計外，仲有傳統長形利市封，配合埋商場特別推出嘅專用「利市袋」，新春派利市自然得心應手啦。想換新利市封好簡單，今個月25日起至下月8日，喺商場即日以電子消費滿$1,000或以上就換到一套；消費滿$2,000或以上，除咗利市封之外，仲送埋「利市袋」㖭。