匡智會與雀巢香港合作回收5號PP膠 主攻即棄餐具減廢

市面上可以回收嘅廢塑膠種類多，好多人未必分得清。黛安話你知，部分廢塑膠例如5號PP塑膠（聚丙烯），即係微波爐餐盒、飲管、即棄餐具等，連政府「三色桶」都唔回收。為咗幫手減廢，匡智會同雀巢香港合作推出全港首個社區回收5號膠試行計劃，大家記得參與，咪做大嘥鬼呀！

三色桶而家主要回收1、2號膠，即係飲品膠樽、膠杯，及個人護理用品膠樽、洗衣液樽等；其餘3至7號膠就要到指定地點回收。今次5號膠回收計劃由今年8月中開始，率先喺元朗區20個屋苑設立回收點，截至上月尾，已回收逾180公斤5號膠，重量相等於超過4,500個外賣餐盒。主辦方見成績幾好，近日宣布將計劃延展至超過30個回收點，希望到明年3月可回收至少300公斤5號膠。

指定參與屋苑將陸續舉行推廣活動，即場參與回收仲可以換領雀巢產品。現時元朗廣場、元朗開心廣場，及位於八鄉嘅青協有機農莊都有份參與㗎。