麥當勞新餐肉系列美食 低脂低鈉更健康

OmniPork登陸麥當勞喇！麥當勞宣布同Green Monday合作，今日起推出期間限定「OmniPork Luncheon新餐肉」系列，以獨家15mm厚切新餐肉炮製多款早晨套餐同McCafé美食，黛安都要去試食啊！

今次全新系列嘅新餐肉唔需要落油煎煮，而且零膽固醇，熱量、飽和脂肪和鈉含量都比罐裝豬肉製午餐肉為低，夠晒健康。早晨套餐包括新餐肉珍寶套餐、新餐肉蛋扭扭粉、新餐肉精選套餐同新餐肉炒蛋堡。另外，新餐肉同時會登陸McCafé，今日起會推出新餐肉蛋沙律意式包同新餐肉碎蛋芝味多士，全日供應㗎。

只要每日早上11點前選購$34早餐Combo套餐，就可以品嘗其中1款新餐肉產品，和一杯熱意式鮮奶咖啡或濃黑咖啡（細杯），如果11點後選購$37午後Combo，就有1款新餐肉產品和一杯熱意式鮮奶咖啡或濃黑咖啡（中杯）。