朗豪坊「筷趣一町」 煮出創意即食麵

黛安平時煮即食麵，都係是但加隻蛋，原來煮即食麵都可以好多花款。最近旺角朗豪坊地庫就開咗間即食麵專門店「筷趣一町」，用創意煮法配搭優質食材，加入日式及西式風味煮麵。好似佢哋嘅特色菜式野菜炒豬肉片或牛肉片即食麵，用章魚小丸子燒汁調味，黛安食過都覺得好正，只售$58。

如果想試下西式風味，可以試下意式卡邦尼即食麵配溫泉蛋，口感同意粉一樣咁煙韌，$68就食到。想食豪啲，可以揀芝士焗活波士頓龍蝦（半隻），可選出前一丁、蟹王麵、讚歧烏冬等麵底，仲要即叫即焗，都係盛惠$278。

另外，「筷趣一町」特設車仔麵概念嘅「自選一町」，可以自選配料、麵條及湯底，有唔少特色配料可以揀，例如酥炸廣島生蠔、酥炸軟殼蟹等，認真滋味。