龍貓主題店進駐德福廣場 推限量精品

日本動畫大師宮崎駿嘅作品，好多大人同小朋友都鍾意，《天空之城》、《魔女宅急便》及《龍貓》等電影都係黛安嘅至愛，百看不厭。最近聽公關姊妹報料，就係龍貓主題新店將於6月下旬進駐德福廣場，為大家帶嚟好多靚靚文具及精品。今次德福店仲會推出分店限定300件貓巴士首飾盒，產品印住九龍灣站，真係好得意㗎，龍貓愛好者萬勿錯過呀！

另外，為咗慶祝新店開張，德福店會優先發售多款新產品，包括千與千尋無臉男浴室系列，有室內拖鞋、圓形地氈，仲有防滑地墊，襯到絕。新店開張期間，購物滿$200仲可免費獲得橡子共和國扣針同埋文件夾；買滿$400以上更會送橡子共和國環保袋，相信唔少爸爸媽媽同小朋友都會愛不釋手。仲有好得意嘅龍貓小帽子，媽媽們一定要搶購番一頂幫仔女扮靚，3個顏色都好靚又易襯衫。各位宮崎駿動畫粉絲，記得今個月尾去德福廣場2期408舖行下，黛安同大家一樣咁期待，已經約好姊妹到時一齊去掃貨喇。