90後的青春短片

前幾天與家人飯敘，姨甥不停睇YouTube，我問他是否在看「健康‧旦」，他說︰「甚麼蛋？我睇緊『小薯茄』！」「哦！學人煲湯！」姨甥望我一眼，嘆口氣，說︰「阿姨！你自己睇下嘞！」哎呀！原來係一個甚受年輕人歡迎的YouTube頻道。

「小薯茄」由一班90後組成，大部分出身自浸會大學的電影學院，製作的短片以友情、情侶關係、生活點滴為主。短片劇情搞笑，易引起共鳴，演員亦各有特色，若有追看電視劇的讀者，相信對程人富和阿冰不會感到陌生，前者曾參演ViuTV《教束》的一角，在短片中是一位不折不扣的笑匠；而有「人哋女朋友」稱號的阿冰亦同樣在ViuTV《理想國》中登場，早排更擔任香港樂隊的新歌MV女主角。另外的三位演員︰阿Ｊ（經常被嘲笑單身）、童童（身材矮小可愛）和麗英（唱將）亦是「好戲之人」。

其中一條最受歡迎的短片《女人化粧睇對象？一眼睇穿邊個最Like你》，講述女人化粧原來有分等級︰由應付一般出街和上班的第一級基本粧，到第三級要迷倒對方的全粧；還有第四級︰零化粧，用真面目對着男朋友！問你死未！

（本欄逢周一刊登）