崔建邦（Amigo）自從2018年同香港代表劍擊運動員崔浩然嘅胞姊Jessica拍拖後，感情一日千里，舊年更傳出婚訊。雖然在破碎家庭長大嘅Amigo自細就有成家立室嘅諗法，但佢話要努力搵多啲錢先娶女友過門。
（Amigo IG）
尋日係Jessica嘅生日，崔建邦公開放閃，喺社交網上載同Jessica及愛犬嘅合照，留言：「Happy happy birthday to my Jess! Wish you have a beautiful life with me and Musa boy! You are the sunshine of my life!（祝我的Jessica生日快樂！希望你和我及狗狗過着快樂的生活！你是我的陽光！）」
（Amigo IG）
Amigo與Jessica同聲同氣，二人都係中韓混血兒。Amigo以往都甚少公開認愛，但同Jessica拍拖幾個月， Amigo 已大方介紹女友畀朋友認識，亦冇避忌現身公眾場所，不過由於 Jessica 任職教師，Amigo希望戀情盡量低調處理，更指會努力經營這段感情，坦承好希望同對方建立一個將來。Amigo曾公開大讚Jessica係個「用心去活」嘅女仔，對生命充滿熱誠，心地善良，非常難得。更加指佢對家人同身邊嘅朋友都好好，而且為咗自己嘅夢想非常努力奮鬥，覺得佢係「對的人」咁話。
Amigo指Jessica（右一）對家人非常好。（崔浩然 IG）
Amigo情史一籮籮，曾經被稱為溝女王嘅佢換畫快過打針，當中最為人所記得嘅就係同「絕世好女友」唐詩詠糾纏咗8年嘅一段情。
2005年Amigo同唐詩詠主持《K-100》時撻着，八年間二人離合多次，期間Amigo負面新聞纏身，更疑似變心後再翻兜。
（東星娛樂）
2009年，崔建邦為節目《打出十人巷》做客席導師，期間同中國、巴西混血兒參選者鄺敏慧（中巴）擦出愛火，不過最後戀情以中巴被「家暴」報警告終，Amigo賤男之名不脛而走，人氣更因此急跌。
中巴當年向傳媒展示傷勢。（東星娛樂）
同年崔建邦被指約會徐菁遙（前名：徐淑敏）夜遊，與女藝人宋熙年、袁彌明同甄穎珊都傳過緋聞。
模特兒陳嘉莉跟崔建邦拍拖一年半，二人一直恩愛，到達談婚論嫁的階段，但至2016年初，二人感情生變，女方更搬離愛巢。
陳嘉莉（網上圖片）
2016年同林珊珊細女李怡（野人）拍拖，更傳出婚訊，但二人拍拖一年多後和平分手。
之後Amigo傳出撻着ViuTV藝人李靖筠，之後更同年過50嘅「美魔女」陳雅倫傳出緋聞。
現任女友Jessica對Amigo一連串嘅「愛情黑歷史」只要上網撳個掣就可以一清二楚，但Amigo話女友依然勇敢接受佢，好快就同咗佢一齊。Jessica曾經既往不究，「霸氣」咁樣回應大家對佢「揀錯人」嘅擔心：「我唔會介意一個人之前做過咩，我只介意佢經過呢啲事之後，佢呢個人究竟會變成點樣。」崔建邦亦打算用行動來話畀女友知，佢依家變成點。
（網上圖片）
Amigo形容Jessica嘅出現係「對的人」，亦係「對的時間」，同Jessica嘅緣份，就好似上天跌落嚟一樣。
撰文：黃蘊姿