「港鐵‧藝術」扶貧畫展 籲公眾關注貧窮問題

每當喺港鐵站睇到具水準嘅畫作，黛安都會覺得既驚喜又減壓，由即日起至7月1日，上環站及西灣河站嘅「港鐵‧藝術」又有精采畫作展出啦！今次嘅展品係超過30幅「1017唔食都得」繪畫比賽嘅優勝作品，每一幅嘅用色同構圖都好靚，仲相當有深層意義呢。

聽公關姊妹介紹，呢個繪畫比賽係「教會關懷貧窮網絡」舉辦嘅其中一項活動，旨在響應2019年10月17日聯合國「國際消除貧困日」，參加者有幼稚園小朋友、中小學生及公眾人士，唔同人都可以透過畫作表達對社會貧窮問題嘅關注，今次主題係鼓勵公眾同低收入人士分享資源。港鐵公司事務總監蔡少綿就話，佢哋好樂意提供平台去宣揚扶貧信息。

黛安知道，港鐵一向都有透過「港鐵‧藝術」呢個計劃，畀藝術家可以喺不同車站舉行藝術展覽，等更多人可以接觸唔同嘅藝術作品。公關姊妹就話，有興趣參與嘅藝術家及機構，可以致電港鐵熱綫2881 8888，或將建議書直接提交畀港鐵就得。

黛安好期待以後搭港鐵，都可以欣賞到更多有深層意義又出色嘅作品，各位藝術家，加油呀！