渠務署新宣傳片 教市民防範水浸

呢幾日天陰陰，天文台亦預測嚟緊一星期會繼續落雨。黛安同渠務署嘅公關傾開，佢話每年4月至10月都係渠務署嘅旺季，今個雨季佢哋除咗推出「及時清渠」安排，噚日亦出咗一條新嘅政府電視宣傳短片（API），特別提醒私人業主要定期檢查和清理排水設施，唔好胡亂填土或改動水道，先可以一齊減低水浸風險。

黛安就留意到，渠務署新嗰套宣傳片，罕有地用咗微縮模型做主角；公關姊妹話，成個拍攝過程因此未受新冠肺炎疫情影響。不過唔好以為拍攝微縮模型好簡單，全片雖然只得30秒，但都用咗接近一整日拍攝，單單係片段一開始嘅落雨場景就用咗4個鐘拍攝！製作團隊咁用心製作，都係想提醒大家「生命財產，唔係講玩」，大家都要合力保持水道暢通啊！