全球最佳智庫排名升19位 團結香港基金影響力增

黛安知道香港有唔少智庫，《全球智庫報告》每年都會對全球智庫進行綜合評價同排名。聽公關姊妹講，喺最新公布嘅《全球智庫報告2019》中，團結香港基金喺「全球最佳智庫（美國及美國以外）」榜升咗19位，位列第112名，仲喺多個公共政策影響力等範疇入選全球百大㖭！

聽講2019年納入評選嘅智庫多達8,248間，當中約22%來自亞洲。評核標準除咗研究成果同人才質素外，仲包括提出創新建議嘅能力、政策建議對社會嘅影響力，同埋運用新媒體嘅能力等。黛安覺得能夠上榜真係唔容易啊。

團結香港基金總幹事鄭李錦芬就話，國際排名躍升，反映基金會嘅研究工作獲得認同。佢仲話2020年宏觀經濟同香港社會正面對急劇變化，智庫喺呢個時期更應發揮關鍵角色，透過專業客觀嘅研究，為政府同社會提供適時到位嘅策略同建議。