中電$2000萬餐飲券 資助基層及中小企

香港貧富懸殊，好多弱勢社群需要大家關心。黛安聽公關姊妹講，中華電力噚日舉辦咗「齊飲齊食齊加油」計劃飲茶活動，同50位住喺深水埗嘅受惠人士一齊飲早茶。

姊妹話，中電撥款2,000萬元推出呢個餐飲券計劃「齊飲齊食齊加油」，同四大餐飲業商會合作，邀請喺中電供電範圍內嘅食肆參與計劃，仲透過社福機構向10萬個有需要家庭，包括長者、低收入家庭同劏房戶，每戶派4張面值50港元嘅餐飲券，畀佢哋喺參與計劃嘅食肆用膳。

其中一位參加者易先生就同黛安講，佢可以用餐飲券喺新年期間同親友去酒樓飲茶聚舊，熱鬧好多。

中電總裁蔣東強就話，過去1年香港社會同經濟飽受考驗，各行業以至基層市民都受到影響，所以希望透過計劃及一系列紓困措施，支援社會各階層。黛安見大家都食得開心，都覺得好窩心啊。