華懋集團舊物改造 變身藝術品分享環保

大眾愈來愈講求環保，日前黛安出席咗華懋集團舉行嘅「但願—光芒再現」升級再造藝術展，呢個喺佢哋「光藝共享」聖誕公共藝術項目嘅重點活動。當日由環境局局長黃錦星同華懋集團執行董事兼行政總裁蔡宏興（Donald）主持綠色聖誕慶祝儀式，佢哋仲分享咗唔少環保小貼士。

為配合展覽嘅環保主題，儀式採用嘅聖誕裝飾都係舊物升級再造，好似巨型聖誕帽就係由華懋集團旗下如心酒店嘅舊枱布及床單製成，雪人就係用酒店舊毛巾造成，非常有心思。

Donald致辭時提到，集團今年聖誕舉行「光藝共享」聖誕公共藝術項目，喺希望鼓勵大家生活過得更環保。黃局長除咗同嘉賓分享節日環保小貼士，仲介紹「低碳生活計算機」鼓勵大家評估過去一年喺衣食住行所產生嘅碳排放量，推動大家改變生活習慣，實踐低碳生活。

呢個展覽一共展出9組藝術作品，會免費開放畀公眾參觀至2月底，每日喺指定時間會有導賞團，大家都去欣賞下由舊物升級做嘅展品啦。