迪士尼「10K Weekend 2019」 傷健融和 全民運動

近年唔少香港人都愛上跑步，黛安知道，香港迪士尼「10K Weekend 2019」跑步比賽會喺11月2至3日舉行，今次大會仲邀請咗香港傷殘青年協會部分健兒，參加11月3日嘅「怪獸公司3公里跑」賽事，貫徹運動不分傷健、全民運動嘅精神，相當有意義啊。

黛安同其中一位輪椅選手朱潤明傾過，原來潤明因為細個患上小兒麻痹症，自小要用腳架同手杖行路，所以好少做運動。直至2012年加入香港傷殘青年協會輪椅隊，先開始投入輪椅運動訓練、鍛練身體，亦有番自信。

潤明話，賽道設計對輪椅跑手嚟講好重要，而迪士尼呢個跑步比賽，無障礙設計做得好，賽道平坦寬闊又安全，可以同時容納輪椅、其他行動不便同埋健全跑手一齊比賽，所以好多謝迪士尼畀咗個機會殘疾或健全人士，可以一齊踏上同一條賽道比賽。

除咗潤明，黛安亦都同另一位中五選手郭紀旻傾偈，紀旻因為先天患有大腦麻痹，行路不穩，日常生活要用電動輪椅代步，近半年佢加入傷青輪椅隊，正式透過輪椅作運動跑步。

紀旻話，今次「怪獸公司3公里」賽事係佢人生第一場跑步比賽，自己好緊張但亦好期待，「因為知道會不分彼此，同所有人一齊跑」；而為咗備戰，紀旻更認真練習，由最初推50米距離都覺得吃力，到依家可以一次過完成3公里距離，真係好大進步！紀旻話對比賽有信心，仲期待可以再一次突破自己。黛安聽到都覺得好感動，希望比賽當日所有選手，都可享受到運動嘅樂趣。