受父親影響立志從醫 梁智鴻︰救心勝救人

人稱「金刀梁」嘅前醫管局主席梁智鴻，醫術高明不在話下，黛安知道，身為「公職王」嘅佢，由手術室到社會，佢對香港都係貢獻良多。最近梁醫生接受馬會出版嘅《駿步人生》訪問，就講出半世紀以來行醫秘辛，原來佢自細受爸爸梁金齡影響，知道醫生不但可用醫術醫人，仲可用知識幫人，佢仲話︰「當年香港仔仍是偏遠漁村，爸爸係唯一嘅醫生，也是唯一諳英語、識得同官員溝通嘅人，所以街坊常會搵佢幫忙。」

梁醫生仲話，當年很多病人求醫時不是付錢，而是封10元利市、加一斤魚和蝦乾等畀醫生，「好多人話醫生搵好多錢，但我相信好多私人執業嘅行家，十個病人裏面有一兩個是不收錢或減價應診。」

1970年代赴美進修嘅梁醫生，曾獲多間當地大學招手請佢出任教職，但佢思前想後都婉拒咗，放棄咗取得美國公民資格嘅機會。「當時我好想服務香港，也不想做二等公民，現在回想，當年決定是對的。」

梁醫生出任多項公職，佢話視作學習過程，將自身由狹窄嘅醫生環境擴闊開來，對社會認識更多。依家佢不時喺電台開咪，仲出咗本書《理性的呼喚》，寄語大家「喺任何環境，理性都好重要，人與人之間如無互諒互讓係行不通嘅。」