7-Eleven懷舊特色模型 珍藏香港昔日風光

儲模型唔係男仔嘅專利，黛安聽公關姊妹講，TINY微影專門設計充滿香港特色的模型，7-Eleven今期就會推出一系列懷舊特色玩具，以甄沾記、Mini Cooper、九巴、交通工具同舊屋邨情景做主題，呢啲玩具模型非常得意，而且充滿香港情懷，黛安都覺得好靚，好想收藏啊。

例如百年老牌椰糖甄沾記，90年代結業後，由第3代後人九姑娘甄賢賢重新創業，今次九姑娘同微影合作推出嘅懷舊車仔，其中按1︰35比例整嘅雪糕單車腳踏，以及車輪都特意設計到可以轉動，前輪可轉向及車頭腳架可以放低，造工好細緻！仲有用1︰110比例造嘅巴士，就用甄沾記舊時雪糕杯嘅紅白藍做主色，再印上甄沾記商標，好值得留念。

另外，Mini Cooper亦趁60周年，推出以香港情懷系列為主題嘅6款合金模型車，用1︰50比例整成，每款車仔嘅車門都可以打開，睇得又玩得。

黛安仲知道，由九巴官方授權推出嘅KMBlock可愛版巴士積木，以丹拿Ａ、圓頂寶同E500 MMC紅巴為主題，每架九巴約有58cm高，內附貼紙，可以自由組裝。而微影亦獲平治官方授權，推出1︰76比例嘅救護車模型，側門加入腳踏、車身印有部隊編號「A499」，同真嘅救護車幾乎一樣㗎。

除咗車仔外，仲有以1︰12比例嘅微好時光系列精品，包括一套3款麻將系列、一套5款童年系列、一套6款廚房系列同一套6款廁所系列，展現香港60至70年代舊屋邨情景。咁可愛嘅模型售價由29元至100元不等，價錢有效期由今日（2日）到10月8日，遲啲可能有變動㗎，快啲帶佢地返屋企啦。