麥當勞限定新品 抹茶新地系列登場

鍾意食雪糕同抹茶嘅朋友注意喇，黛安收到風，麥當勞甜品站同McCafé由今日（30日）起，全新西尾抹茶新地系列就會登場。呢個西尾抹茶新地選用咗產自日本愛知縣西尾市嘅抹茶粉，濃郁嘅抹茶味，茶香深邃，真係好吸引。

大家同時仲可揀配新推出嘅抹茶脆皮，品嘗加倍抹茶味；如果係朱古力愛好者，就可以揀經典朱古力脆皮，外層係朱古力，入面係香軟嘅抹茶雪糕，非常合拍！唔想食新地筒嘅朋友，亦可以選配窩夫筒㗎，再加上Oreo威化卷，啖啖都係甜意入心嘅滋味。

香港金鐘海富中心McCafé同時仲會推出Oreo威化卷西尾抹茶新地窩夫。鬆軟嘅窩夫上面，有一抹茶香甚濃嘅西尾抹茶雪糕，配以鬆脆Oreo威化卷，叫人無法抗拒。西尾抹茶新地系列數量有限，售完即止。

黛安聽到都覺得心動，已經約咗班姊妹去試，鍾意食雪糕或歎綠茶嘅你，快啲去試下呢個限定甜品啦。