玩跳飛機 摺紙遊戲 懷舊玩具展尋童年回憶

講起童年回憶，唔同年代嘅姊妹可能各有不同？但絕對唔少得跳飛機、摺紙遊戲「東南西北」等陪伴幾代人成長嘅地道玩意！公關姊妹同黛安分享，由今個月27日起至11月10日期間，昂坪市集將會變身「玩具時光隧道」，展出多個珍貴又歷史悠久嘅50年代至千禧世代嘅玩具，仲有糖畫及中式吹糖等傳統民間手藝，畀大家重新感受童年時光！

隨着科技愈嚟愈發達，依家嘅小朋友人人都攞住部智能電話，成日低頭打機。其實舊時有好多好玩嘅玩具㗎，如果想睇下那些年嘅有趣玩意，就唔好錯過今個月27日起喺昂坪360舉行嘅「童遊時光」大型互動展覽，現場嘅「玩具時光隧道」展出多個由香港資深玩具收藏家莊慶輝提供嘅經典本土流行玩具，好似古董鐵皮車、煮飯仔套裝等，趣味十足。

現場仲有唔少巨型經典玩具打卡位，包括3米高巨型纜車扭蛋機、飛行棋、七彩扭計骰、趣怪陀螺同摺紙遊戲「東南西北」等，可以同班老友重拾當年回憶，一齊玩下跳飛機，回味下兒時嘅歡樂時光。

活動期間，逢周六、日及公眾假期亦會舉行「周末大笪地」，將有幻彩泡藝表演及精采專業嘅花式搖搖表演睇，大家仲可以免費參與糖畫及中式吹糖等傳統民間手藝玩意，由歷來第一位女吹糖師傅「糖姨」鍾彩雲示範，捏出龍、馬、羊等12生肖，以及海豚、牡丹花等花鳥魚蟲，合共有30幾種類糖藝等。節目咁精采，到時記得過嚟昂坪市集玩下喇！