創作香港聲音地圖 展示自然人文美景

黛安聽講，香港聲學學會為慶祝成立25周年，上年推出「聲景同步」香港聲音地圖創作比賽，收到超過160個作品，而參賽主題分為「城市脈搏」、「自然生態」及「人文景觀」，每個主題設2個大獎，包括聲景俱全大獎同網上投票決定全民造「聲」大獎。

作品利用手機或錄音設備，根據景點主題錄低屬於香港嘅聲音，再加一張相同埋描述。而獲得聲景俱全大獎作品中，「北角春秧街街市」嘅代表聲音，就係該處繁忙時間同電車聲；又有喺夜間錄製，將香港郊野大自然夜生活展示嘅「大埔滘」；更有傳統佛教送別儀式嘅「紅磡暢行道10號」。至於「灣仔天星渡海碼頭」、「金山郊野公園」同「沙田車公廟」就獲得全民造「聲」大獎。

香港聲學學會主席羅志永博士話，參賽作品嘅水平高，令人喜出望外，希望透過比賽提升公眾對本地聲景觀嘅關注。環境局局長黃錦星就指，希望呢個比賽啟發創新意念，以更佳設計改善城市嘅聲景觀，令香港更宜居。