香港國際醫療及保健展 六大展區 睇最新產品

隨着香港人口老化，長者醫療需求愈來愈高，性價比高嘅醫療產品對維持生活質素最為關鍵。第10屆香港國際醫療及保健展今起一連3日喺會展舉行，今年有嚟自10個國家、超過280間參展商到場，向世界各地買家推介最新嘅醫療器材。大會今年分咗六大主題展區，唔少產品都好適合銀髮族。

黛安最推介香港展商帶嚟嘅「防游走監察系統」，呢套系統可監察患有腦退化嘅長者，如長者喺無預警下離開屋企，就會觸發放喺房門或窗口等出口嘅發射器，警報訊號會立即通知護理人員或者屋企人，減少長者走失風險。另一間展商就帶嚟不受空間限制嘅洗頭洗澡機，用家即使平躺喺床上洗頭，都可做到滴水不漏，方便照顧者之餘，病人都可輕鬆keep住整潔。

黛安仲睇中咗一款納米噴霧空氣清新機，部機可利用納米高速震動技術，將香氣以1微米超微粒子散布於空氣中，停留時間長達2小時，且過程無壓縮氣體、無添加揮發性有機化合物，更環保。業界朋友記得去觀摩。

香港貿發局香港國際醫療及保健展

日期︰即日起至本月16日

地點︰香港會議展覽中心

*只供18歲或以上業內人士參觀（免費入場）