香港迪士尼「伴你高飛」獎勵計劃 鼓勵孩子家長並肩尋夢

迪士尼「伴你高飛」獎勵計劃今年踏入第6年，以嘉獎追尋夢想的同學為目標，聯同家庭與學校合作事宜委員會一齊舉辦，噚日就將嘉許禮由樂園移師到九龍塘官立小學舉行，鼓勵家長成為子女追夢路上嘅親密夥伴！

聽公關姊妹講，今年全港有超過300間小學參加，超過6,200名學生和家長獲得嘉許，迪士尼仲捐出咗超過1.2萬張樂園門票畀一眾得獎者。噚日嘉許禮上仲有迪士尼小熊Duffy和好友Cookie登場，大家都玩得好開心，氣氛高漲。

今次獲獎嘅包括喺九龍塘官立小學就讀6年級嘅鍾希瑜，即場表現花式單車，睇佢動作純熟，一定下過唔少苦功。原來希瑜已經係香港代表隊成員，曾代表香港遠赴德國同其他地方比賽。希瑜爸爸就一直好支持女女追夢，仲特登走去學單輪車，仲上埋國際裁判班，認真廿四孝爸爸。

而希瑜嘅學妹項珮爾，就係舊年加入咗學校戲劇組，第一個角色就係飾演媽媽。珮爾話，開頭毫無經驗，好彩媽咪從旁鼓勵，不時參考媽咪嘅言行舉止幫助入戲，令演出好成功，所以特別多謝媽咪多年來嘅照顧和支持。

香港迪士尼樂園度假區企業公民事務總監黎珮珊同黛安講，有夢想、有目標嘅小朋友，佢哋嘅眼睛識得發亮！所以迪士尼好相信追夢會令人變得專注、努力，希望計劃可以幫到小朋友係成長過程中鍛練毅力和不害怕失敗。