中大辦「腦前行」 呼籲關注腦腫瘤

大家都想身體健康，萬一生病難免感到好徬徨，所以做好研究、如何預防疾病好重要。中大王連大腦腫瘤中心上周六（4日）就舉行咗第12屆「腦前行2019」（香港區）慈善步行籌款，籌到嘅經費會用作支持腦腫瘤研究、提高病人護理質素及培訓醫療人員。

逾500名參加者當日由山頂道花園出發，終點為柯士甸山遊樂場，全程約3.5公里。黛安知道呢項全球步行活動由國際腦腫瘤聯盟（IBTA）發起，目的係引起公眾對腦腫瘤嘅關注，盼全球參加者累計總步行里數到今年，可環繞地球五個圈（即約200,000公里）。

活動舉辦以嚟，香港累計步行里數一直係亞洲之冠，現已逾10,000公里，今年成績更創歷年新高，累計步行里數逾1,946公里，真係要畀掌聲呀。