彭耀佳履新旅發局主席 推多元節目撑旅遊促就業

旅發局昨日宴請傳媒朋友同新任主席彭耀佳博士見面，席間Dr Pang對香港旅發局的工作如數家珍，十分厲害。而佢亦係一個旅遊達人，經常外遊。Dr Pang指日本嘅旅遊資源十分豐富，每個季節都有景點，冬天滑雪、春天追櫻，而且食物也有不同；又話日本和香港一樣，交通便捷，治安又好，十分適合外遊旅客，不過佢亦希望我哋可以學習日本人嘅禮貌，令旅客有賓至如歸嘅感覺。

掌握不同需求 百貨應百客

黛安請教佢點樣推廣香港旅遊，佢十分貼地，以自己喺怡和工作時賣過Pizza嘅經驗作比喻，每年有100萬人次去Pizza Hut食Pizza，不同客群有不同的要求，有啲喜歡厚批、有啲鍾意薄批、有啲吃多肉、有啲食素，總之要掌握顧客喜好，滿足佢哋不同需求。Dr Pang話推廣旅遊一樣，要照顧不同客群，有家庭客、有自遊行、有嚟睇Art Basel嘅、有嚟參加Wine & Dine Festival嘅，更有外國朋友專登喺新年嚟香港睇花車巡遊，所以要推出不同嘅旅遊產品去吸引旅客。

講到點解會接手做旅發局主席，Dr Pang就話，自己喺香港長大同工作，希望可以為香港做啲事，而旅遊業對香港好重要，因為能夠提供好多就業機會。

佢仲話旅遊是增長行業，東南亞各個地區都爭呢塊肥肉，因為可以吸納外滙。佢話未來旅發局除咗利用大灣區和港珠澳大橋的便利優勢，吸引高消費嘅旅客來港外，仲會嘗試開發一啲新國家，例如土耳其，以及加大力度，吸引伊斯蘭國家嘅朋友嚟旅遊。