「奧斯卡之夜」晚裝大賽 助年輕設計師實現夢想

唔少行業都希望可培育更多有潛質嘅年輕人入行，時裝設計當然唔例外！黛安知道，有「明星御用晚裝設計師」之稱嘅著名香港晚裝設計師許麗青（Cindy）同林永鏗（Alan），早前搞咗個「裁出天地亞洲時裝設計大賽（香港站）」。來自香港高等教育科技學院（THEi）嘅學生余浚滐仲成為雙料冠軍，獲得3萬元現金獎之餘，仲即時獲得一間國際知名時裝品牌為期4個月嘅工作合約，實現時裝設計師夢想，好勁啊！

黛安知道，今次大賽有15位設計師參賽，每人需以大會作品主題「奧斯卡之夜」設計2款晚裝參賽。參賽者平均年齡只有20至30歲，有啲仲只係大學專科生，雖然係考試期，都用咗超過3個月時間製作晚裝，好有恒心。

Alan仲同黛安講，今次香港站只係起步，嚟緊會延續推廣至大灣區同其他亞洲地區，為年輕人開拓新機遇。

著名時裝設計師鄧達智喺會上致辭時亦都話，最近大病咗一場，而家仲喺康復期，身體成日唔太舒服，但非常欣賞Cindy同Alan全情投入籌辦今次活動，想有更多年輕設計師有出路，即使抱恙都照樣出席支持！