展出五大師得獎作品 太古城動人動畫祭熱播

動畫伴隨不少港人成長，除咗小朋友鍾意睇，唔少作品仲別具深意，值得成人細味。太古城今個星期五（12日）開始，就聯乘MOViE MOViE Cityplaza，舉辦「動人動畫祭」，屆時喺地下活動空間會展出5部頂尖動畫大師得獎作品，包括法國嘅Dilili in Paris、日本Penguin Highway同中東嘅The Tower等，想要恐怖、偵查、情感主題都有，除咗可以喺展覽中「逐格睇」，仲會係戲院同步上映，睇完戲仲可以返去「創意光影動畫」照相館，同番戲中的動畫場景合照，齊齊「做主角」話都無咁易。

除咗國際大師作品，仲有「本地薑」製作。喺「動樂人生」香港動畫放映區內，就會有第六屆動畫支援計劃得獎作品播放，畀大家細味香港製造嘅原創動畫有幾勁。另外，大會仲會喺周末舉辦免費「影．畫分享工作坊」，教大眾動手製作定格動畫，整嚟留念夠晒特別好玩。展覽期去到5月1號咋，唔好錯過呀。