海洋公園大熊貓館暫閉館 靜候盈盈樂樂繁殖佳音

大熊貓係唔少香港人最愛嘅動物之一，皆因佢哋懶洋洋嘅樣真係好可愛！不過，嚟緊有排都無得去海洋公園探佢哋喇！黛安知道，為咗迎接大熊貓盈盈同樂樂一年一度嘅繁殖季節，海洋公園宣布，園內「大熊貓之旅」展館將由即日起，暫停對外開放直至另行通告，等小倆口可以喺合適環境下準備交配，希望今年會有好消息喇！

由四川搬咗嚟香港住嘅盈盈同樂樂，已經13歲，但仲未成功「造熊」，大家都等到好心急。黛安聽公關姊妹講，由3月尾開始，盈盈嬉水時間多咗，樂樂亦喺棲息地留低氣味標記，同嗅探盈盈嘅氣味，同大熊貓普遍每年1次喺3至5月期間嘅發情期脗合；加上盈盈荷爾蒙水平嘅變化，獸醫團隊確認佢哋已進入今年嘅繁殖期！

為咗幫佢哋營造一個合適嘅環境，海洋公園噚日宣布，園內「大熊貓之旅」展館將由即日起，暫停對外開放直至另行通告。

四川臥龍專家來港協助

海洋公園動物及保育執行總監布文傑話，好感激四川臥龍中國大熊貓保護研究中心嘅科學研究與動物管理處負責人凌珊珊專程來港，同公園嘅動物護理及獸醫團隊分享專業知識，並提供實地協助，為今年嘅大熊貓繁殖季節作好準備。

大熊貓國家公園四川省管理局早前講過，隨時歡迎盈盈、樂樂一齊送返臥龍自然保護區進行繁殖，但海洋公園就婉拒咗好意，話樂園專家監察到佢哋已有發情迹象，所以今年將2隻大熊貓送返四川臥龍繁殖嘅可能性好微。相信大家係想有個「香港製造」嘅大熊貓BB，黛安同大家一樣，都好期待聽到大熊貓小倆口嘅好消息！