KAWS COMPANION提早離港 把握今早最後打卡機會

由美國藝術家Kaws創作嘅37米大型吹氣裝置「COMPANION」，上周五（22日）游到嚟香港展出，吸引唔少大人細路齊齊去打卡selfie，黛安當然無執輸！不過，因天氣不似預期，天文台預測未來天氣不穩，原本到月尾嘅展期將提前到今日下午結束，之後仲想見到KAWS嘅身影，不妨轉去PMQ或者會展睇展覽喇！

主辦單位噚日宣布，由於COMPANION只可承受4級風力，但天文台預測周末風力可達4至5級，甚至有雷雨。為免影響公仔嘅狀態同顧及所有海事工作人員安全，決定喺今日提前結束展期，又感謝各大單位、市民同旅客支持，期望下一站再同更多朋友見面咁話。

相信消息會令唔少KAWS迷難免失望，但唔使怕，仲有地方睇到相關作品，好似PMQ元創坊嘅《KAWS︰ALONG THE WAY》展覽，共展出37件精選作品，包括早期作品、巨型戶外雕塑等，展期會到下月14日！另外灣仔會展由今日起至4月1日香港春季拍賣期間，亦會公開展出著名日本服裝設計師NIGO嘅私人收藏專場「NIGOLDENEYE® Vol. 1」，當中包括估價高達600至800萬嘅「THE KAWS ALBUM」等，粉絲們記住唔好錯過！