中環站化身展覽空間 搭港鐵兼睇藝術品

睇藝術品，唔一定要去博物館㗎。港鐵中環站由即日起至5月20日，會喺中環站舉辦「廠出︰JCCAC藝聚港鐵」展覽，展出一系列石硤尾賽馬會創意藝術中心（JCCAC）駐村藝術家嘅作品，返工放工經過J出口，不妨駐足觀賞，感受下香港藝術家嘅創意吖。

JCCAC行政總裁侯婥琪同黛安講，今次展出11個藝術家嘅作品，範疇好多元，由陶藝、油畫、攝影、唐卡到裝置藝術都有得睇，可以係港鐵展出夠晒本土同「貼地」。港鐵公司事務總監蘇家碧都話，希望車站展覽可幫到乘客提升旅程體驗，兼促進本地社區藝術同文化發展，好樂意繼續提供平台㗎。