豬仔錢罌復刻版回歸 傳承香港文化

相信豬仔錢罌係唔少香港人兒時回憶，嚟緊仲會再現香港啊！

黛安知道，九龍城廣場早前特別將「傳統第一代金錢款塑膠豬仔錢罌」神級還原，兼會將100隻復刻版，以及復刻製作用嘅模具送贈畀懷舊雜貨店朱榮記第二代老闆朱耀昌，以後大家有福喇！

一向力撑呢款傳統豬仔錢罌嘅朱老闆，原來以前一直堅持入貨至2014年停產，仲堅持唔炒賣，按正常價發售直至存貨售罄，只為傳承六、七十年代節儉嘅傳統美德，兼維護大家嘅集體回憶！今次收到呢份大禮之後，仲承諾會將呢個以塑膠豬仔錢罌儲蓄嘅傳統香港文化繼續傳承，向到訪朱榮記作深度體驗遊嘅旅客推廣香港文化，相當有心，黛安都好想買番隻啊！