昨日是一年一度的情人節，好多男士都出盡法寶希望冧到女朋友，不過相比起一大束玫瑰花、朱古力或者其他物質性的禮物，張繼聰就選擇做咗一個史上最浪漫的舉動──就是問正在busking的年青人借結他同咪高峰，在海旁即興兼當眾唱出張學友的《每天愛你多一些》，張繼聰表示：「老婆話唔要啲物質禮物，但係要難忘嘅、冧豬嘅、幾十年後都記得嘅，於是我帶佢去海旁，問班年輕人借咗啲架生……。」，最後成功冧到老婆謝安琪，一邊睇老公表演，一邊甜笑，身邊都圍滿粉紅色泡泡。除咗張繼聰之外，周國賢都有即場演唱代表作《目黑》。明星突然出現，吸引半百情侶圍觀欣賞，現場瀰漫著幸福的氛圍，亦紛紛對他們投以羨慕的眼神。
結婚12年要將愛情保鮮不容易，但一向好有諗頭的張繼聰就話冇有怕！因為他多年來一直用3招冧爆老婆謝安琪，堪稱最有心思老公！
1. 做老婆的忠實粉絲
張繼聰話自己就是謝安琪最忠實的粉絲，成日叫對方做My Lady，不時公開對她甜言蜜語：「梗係要同女神自拍啦！阿k，我好鍾意你㗎！」當有人支持她，他就好像自己被稱讚一樣好開心。平時一有時間就會同謝安琪行街，又陪她睇日落，重拾戀愛新鮮感。曾經有次直播，有個觀眾問張繼聰謝安琪在哪裡，他竟然回答：「在這裡」，並將手放上在心口上，隔住螢幕都為謝安琪高興，因為他真是找到一個深深愛著自己的人。
2. 做老婆的跟得司機
不是個個男人都好有耐性，而張繼聰經過每次接謝安琪放工的時光，就領悟出「佛系接老婆法 」︰「唔好問仲要等幾耐， 自己唔好望錶 ，儘量保持發呆，唔好急。如果緣份到了，老婆就會自然出現.....」，證明自己是個「跟得司機」。
3. 做老婆的最強後盾
張繼聰好明白有福同享，有難同當的道理，所以有人指責她，他會第一時間出來護航。以前謝安琪慘被攻擊疑似整容，張繼聰就會馬上回敬網民：「香港有言論自由，可惜未必每位朋友都有尊重別人嘅修養。講我太太，我就講幾句。太陽喺東邊升起係唔需要證明，因為係事實，就好似我覺得我太太有幾靚一樣！」，被抨擊身形，張繼聰又會話：「大家放心，我老婆係會比以前更fit 。（更靚我就唔敢講啦，因為喺我心目中已經好盡吓，不過唔介意再盡啲）」。另外，他知道謝安琪生咗2個寶貝仔女已經好努力，所以自己都好用心做好爸爸的責任，除咗時時上載同一對仔女玩樂的片段，例如同囝囝打FIFA，又做人肉機動遊戲加毛公仔氹囡囡開心，果然是個顧家的好男人，難怪謝安琪可以咁放心。
其實情人節不僅張繼聰，其他明星couples一樣咁sweet，不少情侶、夫婦都好大方咁將合照上載社交平台，又大講甜言蜜語，雙雙放閃！逐個睇吓啦：
1. C君鄭詩君 黃天頤
2. 陸浩明 陳詩欣
3. 張智霖 袁詠儀
3. 杜汶澤 田蕊妮
4. 陳智燊 宋熙年
5. 王祖藍 李亞男
6. 陳展鵬 單文柔
7. 袁偉豪 張寶兒