話說近排梁詠琪Gigi接咗個美容廣告，喺短片裡面佢飾演一名索爆奶奶，有幾個少女話想做佢新抱，之但係佢哋個個皮膚鬆弛、有細紋、暗啞等等，統統被Gigi狠狠地拒絕。咁講真，呢啲說話出自現年42歲嘅Gigi把口真係冇問題，因為佢keep得勁好囉！就好似佢同90後文青女神袁澧林出席電影《小Q》嘅煞科宴上，就可以睇得出邊個先係真．女神，甚至有網民話Gigi嘅出現等同公開「處決」袁澧林。
事關Gigi當晚著住紅色長褸，襯埋條7分長褲同黑色長靴，有型之餘又不失女人味，近鏡望啲皮膚仲要勁白滑，完全睇唔出歲月嘅痕跡，唔講唔知佢已經42歲。至於25歲嘅袁澧林就精彩喇，首先眉頭對上嘅齊蔭新髮型認真夠潮，唔係咁多人carry到㗎；之後又喺兩截黃色碎花裙下面冇啦啦加白色短袖衫，配埋灰色長襪，同波鞋，將運動風、甜美風、懷舊風、型格風混合埋一齊，睇到人拍爛手掌。搞到網民都忍唔住話：「劣化速度驚人...件衫唔襯條裙，條裙又唔襯隻襪，隻襪又唔襯對鞋，仲要打埋黃燈」、「點解係要剪個咁嘅髮型，其實佢五官唔差」、「唔怪之得嫁到西斑牙好老公，Gigi 成個look上到大台，佢就好似中學生咁」等等。
其實Gigi靚唔係第一日嘅事，20歲嘅佢已經迷倒唔少人，眼大鼻高臉尖，加埋高挑身材，就算佢唔做歌手、演員，都有資格行上天橋做模特先。將新舊相對比返，個樣真係冇變過，凍齡女神當之無愧，唔怪之得有網民讚佢由以前到依家都一樣咁靚啦！咁點解Gigi可以keep住咁索？原來佢19年前，啫係23歲嗰陣已經識得保養喇，平時專揀無添加護膚品（不加防腐劑、強調新鮮），做嘢嗰陣化妝照用，但休息喺屋企就會素顏，唔怪之得皮膚咁好啦。