$1300萬元大抽獎慶新年 海洋公園萬豪酒店下月開幕

黛安噚日應海洋公園姊妹邀請，去海龍王餐廳食「金玉滿華堂」團年餐，預早慶祝農曆新年。海洋公園行政總裁李繩宗（Matthias）預告，為迎接豬年同慶祝香港海洋公園萬豪酒店下個月開幕，特別喺今個星期六（26號）至下個月19號，推出「香港海洋公園萬豪酒店開幕『玩.住』賞贏大獎」大抽獎，獎品逾50萬份，總值1,300萬元，每位入園嘅人都有機會中獎！而每日大獎仲會為100位幸運兒送上公園入場門票、酒店住宿、酒店自助午餐等獎品。

黛安覺得最吸引嘅，係所有每日抽獎參加者，都自動進入下個月21號嘅終極大抽獎活動！Matthias話，頭獎幸運兒可獲得國泰航空送出雙人來回香港至指定亞洲航點嘅商務客位機票，價值3萬元；仲有皇家加勒比國際遊輪送出海洋光譜號雙人海景房7晚到日本和菲律賓嘅套票，價值2.3萬元，一共9項豐富獎品，總值超過7萬元！

另外，香港海洋公園萬豪酒店下個月19號正式開幕，酒店市場傳訊總監蔡靜文（Carman）話，即日起至下月28號推出「精彩家庭樂住宿計劃」，最平套票只係2,890元起，包一晚豪華客房、2大1細嘅自助早餐同海洋公園入場門票連海洋快證、300元現金券等！酒店舊年10月底已開始試業，Carman話已做咗幾對新人嘅婚禮，下個月正式營業後，計劃畀新人們可以喺16米高大魚缸前面做證婚！

新嘅一年，Matthias話，海洋公園員工都加咗人工，平均加幅2至4.5%，農曆新年仲有大利市，全職每人1,200元，兼職600元，一齊過肥年！