惜食堂邀髮型師Kim Robinson團隊 為老友記「變髮」迎新年

唔少人都會好似黛安咁，準備剪個靚髮過農曆新年，但對於唔少無收入、活在貧窮綫下嘅長者嚟講，剪髮未必係咁容易嘅事。惜食堂都了解到長者呢方面嘅困難，早前就成功請來殿堂級髮型師Kim Robinson團隊支持，親自為70名有需要長者施巧手「變髮」，氹到一班老友記好開心！

惜食堂一直係黛安最欣賞嘅慈善團體之一，皆因佢哋除咗為唔少長者送上溫飽外，仲照顧到唔少生活需要！好似上星期日咁，佢哋就獲Kim Robinson團隊支持，親自去到惜食堂社區中心舉辦義剪活動，幫一班長者打造新髮型，畀佢哋趁新春佳節前換上新形象。黛安見現場個個老友記都笑容滿面，仲大讚髮型師細心又好手勢！

唔止咁，惜食堂當日仲獲得非牟利團體「花慧綻」支持，為佢哋送上一盤大型花藝擺設之餘，每位理髮後嘅長者亦可得到一盤多肉植物盆栽作為新年禮物，現場一片喜氣洋洋！

黛安知道，相關嘅盆栽係由一班有特殊教育需要（SEN）嘅後生仔設計，展現出無限潛能同創意，再送返畀老人家手上，真係特別有意義。黛安喺呢到祝願大家新年都可以過得開心健康喇！