海洋公園海龍王餐廳主廚顏奕新 奪中餐烹飪世界錦標賽銀獎

海洋公園海龍王餐廳嘅菜式道道都色香味俱全，全賴師傅精湛嘅廚藝。聽公關姊妹講，餐廳嘅中菜部主廚顏奕新師傅，上個月底就參加咗被譽為中餐界「奥斯卡」嘅「魯花杯中餐烹飪世界錦標賽」，仲勇奪「專業組（中餐熱菜）項目」銀獎，認真厲害！

今次比賽以「匠心‧創新‧時尚‧中餐國際化」做主題，分為「專業組」同「青年組」兩個類別，兩組設中式冷菜、中餐熱菜、中餐麵點同果蔬雕刻四項參賽項目。顏師傅就角逐專業組嘅中餐熱菜項目，90分鐘內同逾160位世界專業廚師競賽，喺熱廚房經過一輪激鬥後，顏師傅憑「醋香和牛拼豉香脆撻」同「紫醉金迷」獲頒銀獎榮譽。

黛安就問顏師傅，做出好菜有咩秘訣？佢話中菜嘅菜系同烹調方法其實好多元化，唔一定局限用中國食材，好似第一道牛肉菜式，就用咗日本和牛，配上結合鎮江陳醋同意大利醋調製嘅醬汁，中西合璧。想食到呢兩道得獎菜，大家可以喺星期六、日同公眾假期去海龍王餐廳吃，機會難得一定要試！