冬日限定飲品甜品 McCafé陪你暖笠笠過聖誕

近排天氣開始轉涼，黛安收到風，McCafé最近首度聯乘著名朱古力品牌Hershey's，推出全新「McCafé x Hershey's Winter Merry Kiss-Mas」系列，即日起就有多款冬日限定嘅香濃朱古力飲品同甜品，陪你暖笠笠過聖誕，啱晒一眾朱古力迷！

黛安知道，今次呢個新系列，將會推出連串甜蜜蜜嘅朱古力產品，好似「小鹿榛子朱古力x Hershey's」咁，就以Hershey's可可粉調製，加埋濃郁順滑榛子朱古力，熱飲仲會撒上由朱古力粉整成嘅聖誕小鹿圖案，好睇又好味。另外仲有「雪人薄荷朱古力咖啡」、「薑餅人咖啡」等。

佳節當前，代表甜蜜幸福嘅美味甜點當然唔少得。黛安知道，今次新系列仲有「朱古力蛋糕層層疊x Hershey's」，由班戟皮夾埋以Hershey's可可粉製成嘅朱古力慕絲同鬆軟海綿蛋糕，外層再鋪滿朱古力粉同Hershey's朱古力粒，多重滋味一次過綻放！朱古力迷點可以錯過！

另外，即日起大家只要自攜任何隨行杯到McCafé買細杯裝熱飲，仲可免費升級至中杯裝，等大家同麥當勞一齊愛地球、歎咖啡，活出綠色生活態度，黛安好欣賞。